5-р сарын 12-нд тохиох Олон улсын сувилагчдын баярын өдрийг угтан Манба Дацан эмнэлэг, Оточ Манрамба Их сургуулийн Сувилахуйн багаас “Сувилахуйн тусламж үйлчилгээг сайжруулах сарын аян“-г амжилттай зохион байгуулж, өнөөдөр сувилагчдынхаа ажлыг дүгнэлээ. Сувилагчдын ур чадвар, ард иргэдэд сувилахуйн тусламж үйлчилгээг хүртээмжтэй хүргэх тал дээр шинэ санаачилга дэвшүүлэн ажилласан зэрэг үзүүлэлтийг харгалзан шилдэг сувилагчийг шалгаруулсан бөгөөд Манба Дацан эмнэлгийн “Шинжээч оточ“ лабораторын лаборант Д.Оюунсүрэн тэргүүлж, Усан эмчилгээний кабинетийн сувилагч С.Пүрэвдорж удаалж, Уламжлалтын тасгийн сувилагч Ж.Ариунжаргал гуравдугаар байрт орлоо.
Манба Дацан эмнэлэг нь иргэдэд эрүүл мэндийн тусламж үйлчилгээг аюулгүй, чанартай, хүртээмжтэй, шуурхай хүргэх чиглэлд манлайлан ажиллаж байгаа хамт олон юм.
Дашрамд дурьдахад, Английн иргэн “Дэнлүү барьсан эмэгтэй“ хэмээн дэлхийд алдаршсан сувилагч, багш Флоренсе Найтингелийг Сувилахуйн ухааны үндэслэгч гэж үзэн түүний төрсөн өдөр буюу 5-р сарын 12-ны өдрийг Олон улсын сувилагчдын баярын өдөр болгон тэмдэглэх болжээ. Манай улс Олон улсын сувилагчдын өдрийг 1995 онд анх тэмдэглэснээс хойш жил бүр энэ өдрийг сувилагчдын ажил мэргэжлийг сурталчлах, эрдэм шинжилгээ судалгааны ажлыг дэмжих үйл ажиллагааг зохион байгуулж иржээ.
